Жыхары Магілёва: Ад адной дэвальвацыі - да іншай. Калі гэта скончыцца?

Магілёўцы скардзяцца на рост коштаў і падзенне заробкаў.

За апошні месяц беларускі рубель абясцэніўся да даляра і еўра на 40%. Журналісты «Радыё Свабода» спыталі жыхароў Магілёва пра тое, як за гэты час змяніўся іх заробак ці пенсія. Вось што яны адказалі:

- Зменшыўся заробак дзесьці на паўмільёна. Скасавалі дабаўкі ўсялякія. Унутрана пратэстую, вядома ж.

- Вядома ж, змяніўся. На тыя ж 50% заробак упаў. Дваццаць гадоў пратэстую, а якая карысць?

- Пенсія вельмі малая. Людзі атрымліваюць па 20 мільёнаў, па 10. А мы ж маем па два з паловай. Трэба павялічваць пенсію.

- Нам толькі перад Новым годам паднялі заробак. Здаецца ўздыхнулі ціхенька, а тут на табе - апусцілі, ды яшчэ больш. Было 300 даляраў, а стала 200. Вядома ж, мы працуем, але нам за гэта не плацяць як след.

- Заробак у даляравым эквіваленце ўпаў, вядома ж. У параўнанні з коштамі маленькі. У той жа Еўропе заробак значна вышэйшы, а кошты - такія, як у нас, а то ў нас яшчэ і даражэй каштуе. У нас у дзяржаве гнілая сістэма. Але з сістэмай чалавеку змагацца няма ніякіх магчымасцяў. Таму трываем.

- Дык нічога ж не дадалі - ні пенсіі, ні заробкаў. Але, як мы кажам: «Толькі б спакойна было, а ўсё астатняе перажывем».

- Я вайсковы пенсіянер, у мяне пенсія нармальная, але ўпала на 150 даляраў. Адчуваецца, само сабой. У эканоміцы ў нас нешта не так, народ пакутуе. Думаю, што варта было б падвысіць пенсію.

- Ці паменшыўся заробак. Адчувальна. На тысяч 300-400. Цяпер чатыры мільёны, а было калісьці пяць. Хацелася б больш. Але, што зробіш. Дзе цяпер заробіш больш?

- Вядома ж да даляра зменшыліся. Разабрацца ў сітуацыі цяжка, бо поўнай інфармацыяй не валодаем. А так краіне цяжка - дзе і што ёй браць? Таму даводзіцца разумець.

- Асабіста на сабе я гэта не адчуў, аднак на тых, хто побач, чуў, што праблема ёсць. Праблемы развязальныя. Пратэст - гэта ж не канструктыўная пазіцыя. Трэба глядзець пазітыўна на жыццё.

- Зменшыліся не на 40%, а яшчэ больш. Душы прычыненая чарговая рана. Колькі ўжо гадоў мы б'емся ад адной дэвальвацыі да іншай, спрабуем неяк выжыць. Калі ж гэта нарэшце ўсё скончыцца?

Нагадаем, снежань-студзень былі вельмі стрэсавымі для беларусаў - як для звычайных грамадзян і бізнэсу, так і для высокапастаўленых чыноўнікаў. Увядзенне 30-адсоткавага збору падчас куплі валюты, або так званая «недэвальвацыя», забарона юрыдычным асобам купляць валюту на пазабіржавым рынку, нястача валюты ў абменніках, замарожванне коштаў, паэтапнае скасаванне збору і нарэшце ўзаконьванне 30-адсоткавай дэвальвацыі з далейшым падзеннем беларускага рубля да адзнакі мінус 38% зрабілі ў Беларусі Новы год.