Лукашэнка: Трэба зразумець Захарчанку і Платніцкага - яны ад душы

На расейскім НТВ выйшла інтэрв'ю з Лукашэнкам.

У сюжэце праграмы «Цэнтральнае тэлебачанне» яе вядоўца Вадзім Такменеў распавядае, як праходзілі перамовы «нармандскай чацвёркі» ў Менску, як беларускі бок арганізаваў сустрэчу, дзе сядзелі і што елі кіраўнікі Францыі, Нямеччыны, Расеі і Украіны.

На некалькі пытанняў журналіста асабіста адказвае дыктатар Лукашэнка.

«Мы дамовіліся з Пуціным у Сочы. Ён мне сказаў: «А зможаш ты гэта арганізаваць з пункту гледжання бяспекі, гэта ж няпростая справа?». Я яму кажу: «Слухай, супакойся. Ты ж ведаеш, у Беларусі могуць усё, мы ўсё зробім на вышэйшым узроўні... Нават дзіркі ў асфальце заладзілі».

«Я з Парашэнкам у кантакце быў. Гэта таксама была мая праца. Увесці яго ў курс справы, што-небудзь сказаць, падказаць. Але Пуцін яму паслаў вельмі прыемны і магутны меседж з нагоды ваеннага ўладкавання гэтых тэрыторый, я яму сказаў і сваю пазіцыю выказаў».

«Мне заўсёды хацелася і цяпер яшчэ больш хочацца сказаць - хлопцы, давайце, мы ўтрох на справе, утрох, без усялякіх пасярэднікаў дамовімся, як скончыць гэтую вайну. Як зразумець і засцерагчы гэтых людзей, якія ідэйна ваявалі за сваю зямлю, як з імі дамовіцца. Вы ж разумееце, што Захарчанка і Платніцкі, як бы да іх не ставіліся, а раптам яны ад душы».