Даўжнікоў будуць пазбаўляць жылля

Законапраект ужо знаходзіцца ў «палатцы».

На думку міністра юстыцыі Алега Сліжэўскага гэты захад будзе стымуляваць людзей своечасова выплачваць запазычанасці.

Канфіскацыя элітнага жылля за запазычанасці можа стаць нормай закона, паведаміў 17 лютага міністр юстыцыі Беларусі Алег Сліжэўскі падчас прэс-канферэнцыі, прысвечанай рабоце органаў юстыцыі, паведамляе БелТА.

«Тая ініцыятыва, якую мы сёння хочам рэалізаваць з дапамогай адпаведных нормаў у законе аб выканаўчай вытворчасці (магчымасць звароту спагнання на так званае элітнае жыллё), стане яшчэ больш стымулюючым фактарам для даўжніка плаціць па сваіх пазыках. Гэты праект закона ўжо знаходзіцца на разглядзе ў «парламенце», - адзначыў Алег Сліжэўскі.

Са слоў міністра, пад элітным жыллём будзе разумецца катэдж або кватэра, якія па сваёй плошчы значна перавышаюць тыя нормы, якія павінны захоўвацца за кожным паўналетнім чальцом сям'і, якія пражываюць у гэтым памяшканні.

Алег Сліжэўскі таксама нагадаў, што сёння да даўжнікоў могуць прымяняцца розныя захады ўздзеяння: абмежаванне права выезду за мяжу, кіраванне транспартным сродкам, забарона на паляванне і іншыя. Акрамя таго, існуюць нормы, якія прадугледжваюць адказнасць за невыкананне пастановы суда.