Пуцін назваў украінскіх вайскоўцаў у Дэбальцаве «нарывамі»

Прэзідэнт РФ патрабуе «скончыць праблему» Дэбальцавам.

Уладзімір Пуцін заявіў, што ўкраінскае войска прайграе ў аточаным горадзе ўчорашнім «шахцёрам і трактарыстам», у чарговы раз адкінуўшы абвінавачванні ў тым, што ў Данбасе ваююць кадравыя расейскія вайскоўцы. Пра гэта ён сказаў на сумеснай прэс-канферэнцыі з прэм'ер-міністрам Венгрыі Віктарам Орбанам, паведамляе ТСН.

«Вядома, прайграваць заўсёды дрэнна, гэта заўсёды бяда для пераможаных, асабліва прайграваць учорашнім шахцёрам або трактарыстам. Але жыццё пойдзе далей, не трэба на гэтым зацыклівацца», - сказаў Пуцін.

Акрамя таго, расейскі прэзідэнт уважае ўкраінскіх вайскоўцаў у Дэбальцаве «нарывамі» і сказаў, што з гэтай праблемай трэба канчаць.

«Трэба скончыць праблему, звязаную з аточанай групоўкай. Наша агульная задача ў тым, каб выратаваць жыцці людзей, якія апынуліся ў гэтым катле. І каб гэты нарыў не пагоршыў стасункі паміж афіцыйнымі ўладамі і апалчэннем Данбаса», - сказаў Пуцін.

Прэзідэнт РФ прызнаў, што па ўсёй лініі судакранання рэжым спынення агню агулам выконваецца, за выключэннем Дэбальцава. Ён таксама адзначыў, што адказныя асобы павінны не перашкаджаць украінскім вайскоўцам, якія апынуліся ў атачэнні, складваць зброю і не будуць пераследваць людзей, якія хочуць скласці зброю. У сваю чаргу баевікі не павінны ўтрымліваць гэтых людзей і павінны дазваляць ім пакінуць зону канфлікту і вярнуцца да сваіх сем'яў, паведамляе УНІАН.

Нягледзячы на абвешчанае з 15 лютага перамір'е, у раёне Дэбальцава ідуць жорсткія баі. Лідары самаабвешчаных ДНР і ЛНР заявілі, што маюць намер узяць Дэбальцава любым коштам. На вечар аўторка, 17 лютага, імі была захопленая вялікая частка горада.