ЗША ўключылі санкцыі супраць Расеі ў новую стратэгію нацыянальнай бяспекі

У стратэгіі асуджаецца расейская агрэсія супраць Украіны, а таксама прадугледжваецца працяг ціску на РФ пры дапамозе санкцый ды іншых захадаў.

Пра гэта гаворыцца ў тэксце новай стратэгіі нацыянальнай бяспекі ЗША, якая маецца ва ўласным распараджэнні Bloomberg, паведамляе "ЕвроПравда". Стратэгія крытыкуе расейскую агрэсію супраць Украіны і абяцае, "як і раней, прымушаць Расею несці страты з дапамогай санкцый ды іншых сродкаў".

Як паведамляе агенцтва, у новай стратэгіі прэзідэнт Барак Абама заяўляе, што ЗША пераносіць сваю ўвагу за межы войнаў у Іраку і Афганістане для барацьбы з экстрэмізмам, тэрарызмам, кібэратакамі, расейскай агрэсіяй, зменай клімату ды іншымі пагрозамі.

Так, у дакумэнце адзначаюцца выклікі, з якімі ЗША давялося сутыкнуцца на працягу апошніх пяці гадоў.

Да іх залічаныя з'яўленне экстрэмісцкай групоўкі "Ісламская дзяржава ў Іраку і Сірыі", узмацненне супярэчнасцяў паміж Кітаем і амэрыканскімі хаўруснікамі ў Азіі, а таксама анэксія Расеяй Крыма і далейшая падтрымка сэпаратыстаў на ўсходзе Украіны.

Як адзначаецца ў 33-старонкавым дакумэнце, спатрэбяцца гады, каб зліквідаваць пагрозы для нацыянальнай бяспекі ЗША.