ЕАБР: Далейшы рост вонкавай запазычанасці - крыніца рызыкі для Беларусі

Змена дзяржаўнай запазычанасці, намінаванай у замежнай валюце, з'яўляецца крыніцай рызыкі для Беларусі.

Такая выснова прыводзіцца ў лютаўскім выпуску макраэканамічнага дайджэста, які падрыхтаваны аналітычным кіраўніцтвам Еўразійскага банка развіцця (ЕАБР), піша БелаПАН.

Аналітыкі банка нагадваюць, што дзяржаўная запазычанасць Беларусі на 1 студзеня 2015 дасягнула 197,5 трлн беларускіх рублёў (25,4% ад ВУП). Пры гэтым вонкавая запазычанасць склала 12,6 млрд даляраў (19,2% ад ВУП), унутраная дзяржаўная запазычанасць - 48,4 трлн рублёў (6,2% ад ВУП). Годам раней, адзначаюць аналітыкі, дзяржаўная запазячанасць складала 23,7% ад ВУП, у тым ліку вонкавая - 18,2%, унутраная - 5,5% ад ВУП.

«Дзяржаўная вонкавая запазычанасць павялічылася за 2014 умераным чынам - галоўнай крыніцай фінансавання значнага дэфіцыту рахунку існых аперацый у гэты перыяд было зніжэнне міжнародных рэзерваў. У складзе дзяржаўнай пазыкі пераважае вонкавая пазыка, намінаваная ў замежнай валюце, што з'яўляецца крыніцай рызыкі, асабліва прымаючы пад увагу змену», - падкрэсліваецца ў дайджэсце ЕАБР.

Варта адзначыць, што ў гэтым годзе Беларусь павінна выплаціць па ўнутраных і вонкавых дзяржаўных абавязацельствах больш за 4 млрд даляраў. Паводле інфармацыі БелаПАН, каля 3,1 млрд даляраў неабходна будзе пералічыць у кошт выплаты і абслугоўвання вонкавай дзяржаўнай запазычанасці.

Найбольшы аб'ём замежных валютных плацяжоў прыпадае на выплату і абслугоўванне дзяржаўнай запазычанасці, што ўтварылася ў сувязі з выпускам Беларуссю пяцігадовых еўрааблігацый у 2010 годзе. У кошт выплаты гэтых абавязацельстваў краіна павінна будзе вярнуць у гэтым годзе амаль 1,2 млрд даляраў.

Акрамя таго, неабходна выплаціць 716,3 млн даляраў міждзяржаўных крэдытаў Расеі. Запланаваныя таксама выплаты што да крэдыту Антыкрызіснага фонду ЕўрАзЭС у 541,2 млн даляраў.

Па крэдытах Кітая і Венесуэлы Беларусь павінна будзе выплаціць у гэтым годзе 380,4 млн І 121,8 млн даляраў адпаведна.

На гэты год таксама прыпадаюць выплаты Беларусі ў абслугоўванні і выплаце ўнутранай валютнай дзяржаўнай запазычанасці, якія складуць каля 1 млрд даляраў.

Паводле звестак Міністэрства фінансаў, на выплату вонкавай дзяржаўнай запазычанасці ў 2015 годзе плануецца накіраваць $1,9 млрд паступленняў бюджэту ад вывазных падаткаў на нафтапрадукты, яшчэ каля 330 млн даляраў плануецца адшукаць на выплаты дзяржаўнай запазычанасці за кошт збірання падаткаў ад экспарту беларускай нафты.

Акрамя таго, у гэтым годзе для выканання абавязацельстваў што да вонкавай дзяржаўнай пазыкі ўрад мае намер размясціць аблігацыі на 1 млрд даляраў на замежным рынку і пазычыць каля 800 млн даляраў за кошт унутраных аблігацый.

Разам з тым экспэрты фінансавага рынку Беларусі адзначаюць: у гэтым годзе Беларусі будзе няпроста зноў прыцягнуць пазыкі за кошт размяшчэння новых выпускаў даўгавых папер. Паводле стану на 9 лютага даходнасць па сямігадовых беларускіх еўрабондах, якая адлюстроўвае прыкладны кошт новых запазычанняў, знаходзілася на ўзроўні 18%. Па такой стаўцы, упэўненыя беларускія эканамісты, краіна не стане размяшчаць новы выпуск аблігацый для прыцягнення валютных пазык.