Эрык Рубін: Санкцыі супраць беларускіх чыноўнікаў захаваюцца

Санкцыі ЗША ў дачыненні да Беларусі будуць дзейнічаць да таго часу, пакуль не будуць выкананыя ўмовы для іх скасавання.

Пра гэта заявіў намеснік памочніка дзяржсакратара ЗША ў справах Еўропы і Еўразіі Эрык Рубін у інтэрв'ю БелаПАН і парталу tut.by.

"Санкцыі, якія ў адпаведнасці з нашым заканадаўствам уведзеныя праз сітуацыю з правамі чалавека і дэмакратыяй у дачыненні да Беларусі, працягваюць дзейнічаць і будуць дзейнічаць да таго часу, пакуль не будуць выкананыя ўмовы, пры якіх магчымае іх скасаванне", - сказаў ён.

Пры гэтым Рубін падкрэсліў: ЗША ўважае за важнае працягваць працу над паляпшэннем стасункаў з Беларуссю, нягледзячы на тыя рознагалоссі, якія існуюць у некаторых пытаннях, прынамсі, у сферы правоў чалавека.

"Падчас абмеркавання з прадстаўнікамі беларускіх уладаў мы маглі згаджацца, маглі разыходзіцца ў поглядах, але мы сышліся ў меркаванні, што трэба працягваць працу ў пошуку пастаноў, - адзначыў прадстаўнік Дзярждэпу. - Мы мяркуем, што развіццё стасункаў паміж ЗША і Беларуссю, падтрымка незалежнасці і суверэнітэту Беларусі, падтрымка эканамічнага росту, гандлю, стварэння працоўных месцаў не ўступаюць у канфлікт з тымі сферамі, у якіх у нас існуюць рознагалоссі. На самай справе мы мяркуем, што паляпшэнне стасункаў паміж ЗША і Беларуссю ў праблемных сферах можа пазітыўна паўплываць на ўсе сферы".

Эрык Рубін адмовіўся назваць колькасць беларускіх чыноўнікаў, унесеных у спіс асобаў, якім забаронены ўезд на тэрыторыю ЗША. "Што тычыцца візавых абмежаванняў, якія ўведзеныя паводле амерыканскага заканадаўства ў сувязі са станам правоў чалавека і дэмакратыі ў Беларусі, то яно не дазваляе мне называць ні імёны, ні колькасць гэтых людзей. Але я хачу падкрэсліць: мы б хацелі, каб гэтыя абмежаванні былі скасаваныя , для чаго неабходны прагрэс у развязанні праблем, адзначаных у заканадаўстве. Гэта зрабіла б магчымым далейшае паляпшэнне стасункаў", - сказаў прадстаўнік Дзярждэпартамента.

Ён таксама адзначыў, што сваю палітыку санкцый у дачыненні да Беларусі ЗША каардынуюць з ЕЗ. "Наша палітыка ў гэтым пытанні каардынуецца з Еўразвязам. Мы дамовіліся, што будзем выпрацоўваць сумесны падыход у сваіх стасунках з Беларуссю ў розных галінах", - падкрэсліў Рубін.

Намеснік памочніка дзяржсакратара ў справах Еўропы і Еўразіі наведаў Менск 26-28 лютага. Ён сустрэўся з Аляксандрам Лукашэнкам і міністрам замежных спраў Уладзімірам Макеем, а таксама прадстаўнікамі грамадзянскай супольнасці, палітычнай апазіцыі і сваякамі палітвязняў.

Фота прэс-службы амбасады ЗША