У Беларусі з'явяцца новыя палітвязні?

Следчы камітэт пачаў крымінальную справу паводле факта абразы анархістамі суддзі Ленінскага раёна Менска Андрэя Камушкіна.

Пра гэта БелаПАН паведамілі праваабаронцы закрытага ўладамі праваабарончага цэнтра «Вясна».

Справа распачатая паводле артыкула 391 КК (абраза суддзі або народнага засядацеля). Санкцыя гэтага артыкула прадугледжвае штраф, папраўчыя працы да двух гадоў, арышт ад трох да шасці месяцаў або абмежаванне волі да трох гадоў.

Увечары 29 студзені 2015 г. анархісты правялі акцыі салідарнасці з арыштаванымі паплечнікамі. Адна з акцый прайшла ў двары дома, дзе жыве суддзя Андрэй Камушкін, які раней асудзіў анархістаў у агульнай суме на 65 дзён арышту. Як паведамляў сайт беларускіх анархістаў, пад'езды і найбліжэйшыя машыны былі абвешаныя ўлёткамі, «Аб'яўляю суддзю ў вышук за вынясенне несправядлівых прысудаў і прыцягненне ў якасці абвінавачанага загадзя невінаватага».

Паводле інфармацыі праваабаронцаў, у якасці сведкі паводле гэтай справы быў дапытаны малады чалавек, другога выклікалі на допыт праз тэлефон.

У прэс-службе Следчага камітэта паабяцалі даць інфармацыю паводле гэтай справы на наступным тыдні.