Лешак Шарэпка: Наша ўмова - вызваленне палітвязняў у Беларусі

Пасол Польшчы ў Беларусі распавёў, пры якіх умовах могуць палепшыцца стасункі Менска з краінамі Захаду.

Лешак Шарэпка ў інтэрв'ю tut.by нагадаў аб наяўнасці палітычных вязняў у нашай краіне.

- Мы не хаваем сваіх чаканняў ад Беларусі. Мы б хацелі, каб Беларусь, як еўрапейская краіна, больш звяртала ўвагі на правы чалавека. Ва ўсіх краін ёсць праблемы з гэтым, у нас яны таксама ёсць, - мяркуе пасол Польшчы ў Беларусі. - У гэтым сэнсе ваша краіна не выключэнне, але ёсць момант, які адрознівае яе ад іншых: у вас тэма правоў чалавека яшчэ звязаная і з палітычным пытаннем. Права на свабоду выказванняў, сходаў... Тут узнікаюць праблемы. Мы мяркуем, што ў Беларусі ёсць палітвязні. Наша ўмова, якая да гэтага часу ў дзеянні, каб іх выпусцілі.

- Гэта значыць, калі мы выпусцім палітвязняў, гэта палепшыць узаемастасункі?

- Гэта будзе сведчаннем таго, што беларускі бок прыслухоўваецца да таго, што мы гаворым, улічвае нашу пазіцыю, яна зацікаўленая стасункі палепшыць.

Нагадаем, цяпер у Беларусі за кратамі знаходзяцца шэсць палітзняволеных: Мікалай Статкевіч, Ігар Аліневіч, Мікалай Дзядок, Юры Рубцоў, Яўген Васьковіч і Арцём Пракапенка. На палітычных вязняў стала ціснуць, а таксама пагаршаюць ўмовы іх утрымання.