«Хартыю-97» часткова разблакавалі напярэдадні прыезду чатырох прэзідэнтаў?

Прыкладна траціна апытаных карыстальнікаў паведамляюць, што могуць чытаць Charter97.org у Беларусі.

Частка карыстальнікаў з Беларусі сталі паведамляць пра магчымасць чытаць Charter97.org без выкарыстання ананімайзераў і спецыяльных праграм. Але свабодна «Хартыя-97» адкрываецца толькі прыкладна ў траціны апытаных намі чытачоў.

Магчыма, улады наважылі «прыадчыніць» сайт у сувязі з прыездам у Беларусь двух еўрапейскіх камісараў Ёханэса Хана і Марыі Габрыэль, а таксама ў сувязі з будучым візітам у Менск на наступным тыдні чатырох прэзідэнтаў - Аўстрыі, Польшчы, Ізраіля і Нямеччыны - якія павінны прыехаць на адкрыццё мемарыяла ў Трасцянцы.

Просім нашых чытачоў на адрас charter97@gmail.com і ў каментарах паведаміць ці адкрываецца ў вас Charter97.org, Charter97.eu і Charter97.info.

Нагадаем, сайт Charter97.org блакуецца ў Беларусі з 24 студзеня гэтага года. Блакаванне папулярнага незалежнага сайта асудзілі ўрады еўрапейскіх краін, міжнародныя праваабарончыя арганізацыі і структуры, уключна з АБСЕ і Еўрапейскім парламентам.