Лекары расказалі, чаму важна адразу ж пачаць лячыць заражанага «Омікронам».

Гэты штам каранавіруса мае свае асаблівасці.

Працяканне COVID-19, выкліканага варыянтам "Омікрон", мае свае асаблівасці. Ён здольны прабіваць абарону вакцынаваных і раней хворых на іншыя штамы каранавірусу.

Пра гэта гаворыцца ў паведамленні вядомага лекаркі-інфекцыяністкі, доктара медыцынскіх навук Вольгі Галубоўскай у Facebook.

Інфекцыяністка пералічыла асаблівасці працякання і сімптомы "Омікрона", сярод якіх высокая тэмпература праз высокую вірусную нагрузку.

Асаблівасці працякання «Омікрона»:

«1. У дэбюце тэмпература цела ў пацыентаў часцей падвышаная, можа дасягаць 39 градусаў і вышэй, але, як правіла, да цяжкай дыхальнай недастатковасці справа не даходзіць.

2. Хварэюць таксама вакцынаваныя, якія маюць высокія тытры антыцелаў (максімальную колькасць, якую я назірала - 75 000 AU/мл). Пачасціліся відавочна паўторныя выпадкі захворвання. Розніцы ў цячэнні хваробы асаблівай няма. Вымяраць тытры антыцелаў таксама сэнсу няма.

3. Такія асаблівасці захворвання звязаныя з тым, што ўзбуджальнік мае больш за 30 мутацый у S-бялку, 15 з якіх знаходзяцца ў рэцэптарзвязаным дамене. Гэта значыць узбуджальнік пазбаўлены магчымасці эфектыўнага звязвання з рэцэптарамі, пазбягае дзеяння нейтралізавальных антыцелаў да іншых варыянтаў віруса, мае менш цяжкае цячэнне хваробы, але кампенсуе ўсё гэта аблегчанай перадачай, што прыводзіць да хуткага росту захворвання.

4. Тэмпература цела ў дэбюце абумоўлена высокай віруснай нагрузкай, яшчэ большай, чым пры варыянце Delta, але з цяжкасцю цячэння гэта не заўсёды карэлюе», - расказвае экспэрт.

Вольга Галубоўская кажа, што нас чакае рост захваральнасці, зрэшты, гэтая хваля абяцае быць не такой трагічнай.

«Але разлічваць на поўны дабрабыт яшчэ рана: групы рызыкі будуць усё ж уразлівыя да цяжкага цячэння, цалкам расслабляцца не варта», – кажа лекарка.

Галубоўская таксама акцэнтавала ўвагу на раннім лячэнні інфікаваных.

«Тактыка вядзення хворых (незалежна ад статусу вакцынацыі) павінна быць аднолькава нязменнай - ранняе лячэнне супрацьвіруснымі прэпаратамі. Рана - гэта адразу пасля ўстанаўлення дыягназу, у першы тыдзень. Гэта найбольш эфектыўна, што мы маем сёння», - адзначыла лекарка.