Навукоўцы патлумачылі, чаму фісташкі надзвычай карысныя
4- 29.10.2024, 15:03
- 7,716
Асабліва ў сталым веку.
Фісташкі з'яўляюцца не толькі смачнымі, але і карыснымі для здароўя чалавека. Напрыклад, гэтыя арэхі могуць абараніць нашы вочы і мозг ад пагаршэння стану з узростам. Пра гэта гаворыцца ў новым даследаванні Універсітэта Тафтса, штат Масачусэтс, піша Newsweek.
«Фісташкі - гэта багатая пажыўнымі рэчывамі закуска, якая змяшчае неабходныя вітаміны, мінералы і антыаксіданты. Асабліва цікавае ўнікальнае змяшчэнне лютэіну, расліннага пігменту, які гуляе вызначальную ролю ў здароўі вачэй. Лютэін дапамагае абараніць вочы ад пашкоджанняў, выкліканых сінім святлом і акісляльным стрэсам. Гэта робіць фісташкі не проста смачнай закускай, а функцыянальным прадуктам харчавання з асаблівымі перавагамі для здароўя», - адзначае вядучы аўтар даследавання прафесар Тамі М. Скот з Фрыдманскай школы дыеталогіі і Медыцынскай школы Універсітэта Тафтса.
Таксама навукоўцы Тафтса даследавалі лютэін і яго аналаг зэаксанцін, якія з'яўляюцца антыаксідантамі, што змяшчаюцца ў зялёнай гародніне, яечных жаўтках і фісташках.
З іх слоў, ужыванне 60 грамаў фісташак на дзень звязанае з павелічэннем аптычнай шчыльнасці макулярнага пігменту (MPOD), які з'яўляецца важным паказчыкам здароўя вачэй.
«Мы абралі для даследавання фісташкі, бо гэта адзіны арэх, які змяшчае значную колькасць лютэіну – кароціноіда, вядомага сваёй ахоўнай роляй для вачэй», – адзначае Скот.
У даследаванні таксама гаворыцца, што лютэін і зэаксанцін назапашваюцца ў цэнтральнай частцы сятчаткі, дзе яны фільтруюць шкоднае сіняе святло і памяншаюць яе знос.
«Улічваючы, што фісташкі таксама змяшчаюць карысныя тлушчы, якія спрыяюць засваенню пажыўных рэчываў, мы выказалі здагадку, што яны могуць быць эфектыўнай дыетычнай стратэгіяй для падвышэння [MPOD]», – дадае даследчык.
Аднак каб праверыць гэтае сцвярджэнне, навукоўцы правялі даследаванне, у якім узялі ўдзел 36 дарослых ва ўзросце ад 40 да 70 гадоў, якія былі здаровыя, за выключэннем нізкага спажывання лютэіну.
Удзельнікаў выпадкова падзялілі на дзве групы, адна з якіх працягвала спажываць свой звыклы рацыён, а іншая дадала 60 г фісташак на дзень.
«Вынікі былі выразнымі: у тых, хто еў фісташкі, назіралася значнае павышэнне ўзроўню MPOD ужо праз шэсць тыдняў, што сведчыць аб тым, што рэгулярнае ўжыванне фісташак можа дапамагчы захаваць здароўе вачэй, бо павышае ўзровень лютэіну ў сятчатцы», – заўважае Скот.
Акрамя таго, лютэін, які ёсць у фісташках, можа садзейнічаць здароўю мозгу, бо ён трапляе ў яго з крыві і дзейнічае як антыаксідант, супакойваючы запаленне - галоўны фактар рызыкі такіх захворванняў, як дэменцыя.
«Мы спадзяемся, што людзі пачнуць разглядаць фісташкі як нешта большае, чым проста здаровую закуску. Нашы вынікі сведчаць аб тым, што фісташкі могуць быць простым і натуральным спосабам падтрымання доўгатэрміновага здароўя вачэй. Гэта асабліва важна з узростам, калі рызыка ўзнікнення праблем са зрокам узрастае», - дадае Скот.
Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe
Звязацца з намі можна праз адрас charter97@gmail.com
