У Польшчы праходзяць выбары прэзідэнта

У першым туры за пасаду змагаюцца 13 кандыдатаў.

Сёння, 18 траўня, у Польшчы праходзіць першы тур выбараў прэзідэнта, паведамляе Charter97.org са спасылкай на польскія СМІ.

Паводле прагнозаў, асноўная барацьба разгорнецца паміж трыма кандыдатамі.

Выбарчыя ўчасткі будуць працаваць з 7 раніцы да 21 гадзіны вечару (08:00 – 22:00 паводле Менска).

Калі ніводзін з кандыдатаў у прэзідэнты не атрымае больш за 50% галасоў, 1 чэрвеня адбудзецца другі тур. У ім будуць удзельнічаць два прэтэндэнты, якія набралі найбольшую колькасць галасоў у першым туры.

Новаабраны прэзідэнт павінен прыняць прысягу да 6 жніўня 2025 года, паколькі ў гэты дзень заканчваюцца паўнамоцтвы дзейнага кіраўніка дзяржавы Анджэя Дуды.

Вылучацца ў прэзідэнты могуць грамадзяне Польшчы, якія дасягнулі 35-гадовага ўзросту, не пазбаўленыя выбарчых правоў і сабралі сама меней 100000 подпісаў у падтрымку сваёй кандыдатуры.

На сёлетніх выбарах зарэгістравана 13 кандыдатаў

Рафал Тшаскоўскі («Грамадзянская кааліцыя»)

Караль Наўроцкі (беспартыйны, пры падтрымцы партыі «Права і справядлівасць»)

Славамір Менцэн («Канфедэрацыя»)

Магдалена Беят (беспартыйная, пры падтрымцы «Новыя левыя» і «Польскай сацыялістычнай партыі»)

Шымон Галаўня («Польшча 2050»)

Артур Барташэвіч (беспартыйны)

Гжэгаж Браўн («Канфедэрацыя Польскай Кароны»)

Марэк Якубяк («Кукіз15», «Федэрацыя за Рэспубліку»)

Мацей Мацяк (беспартыйны)

Яана Сенішын (беспартыйная)

Кшыштаф Станоўскі (беспартыйны)

Марэк Вох (беспартыйны)

Адрыян Зандберг (партыя «Разам»)

Хоць за пасаду прэзідэнта будуць спаборнічаць 13 кандыдатаў, паводле перадвыбарных апытанняў, асноўная барацьба разгорнецца паміж трыма палітыкамі: Рафалам Тшаскоўскім, Каралем Наўроцкім і Славамірам Менцэнам.

Паводле апошняга апытання перад выбарамі, праведзенага United Surveys для Wirtualna Polska 13–15 траўня:

лідарам прэзідэнцкай гонкі застаецца Рафал Тшаскоўскі з 31,5% падтрымкі, нягледзячы на зніжэнне на 1,7 адсоткавых пункта за тыдзень;

Караль Наўроцкі зафіксаваў значны рост і набраў 26,6%. Гэта скачок на цэлыя 3,4 адсоткавых пункта;

трэцяе месца ў рэйтынгу займае Славамір Менцэн, які мае 11,7 адсотка падтрымкі.

Калі адбудзецца другі тур з удзелам Рафала Тшаскоўскага і Караля Наўроцкага, перамогу прагназуюць Тшаскоўскаму з падтрымкай у 56,2% супраць 43,8% у апанента.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com