WSJ: Украіна вырабляе больш зброі, чым калі-небудзь

Але дапамога хаўруснікаў усё роўна неабходная.

На трэці год вайны ўласная абаронная прамысловасць Украіны вырабляе больш зброі, чым калі-небудзь. Аднак дапамога хаўруснікаў усё роўна застаецца крытычна неабходнай у супрацьстаянні Расеі, піша The Wall Street Journal.

Як адзначае выданне, калі на момант уварвання Расеі ва Украіны быў усяго адзін прататып гаўбіцы «Багдана» айчыннай вытворчасці, то ўжо летась Кіеў заявіў, што вырабляе больш артылерыйскіх гарматаў, чым усе краіны NATO разам узятыя.

«Кошт зброі, якую можа вырабляць абаронная прамысловасць Украіны, вырасла з 1 мільярда даляраў у 2022 годзе да 35 мільярдаў даляраў за тры гады вайны, нават пры тым, што Расея абстрэльвае ракетамі яе заводы», – падкрэсліваецца ў артыкуле.

Як паказвае WSJ, ва ўмовах нявызначанасці падтрымкі з боку ЗША абаронная прамысловасць Украіны становіцца ключавой для здольнасці краіны падтрымліваць барацьбу з Расеяй або гарантаваць свой суверэнітэт у выпадку заключэння мірнага пагаднення:

«Чым больш уласнай зброі зможа вырабляць Украіна, тым менш уразлівай яна будзе перад капрызамі міжнароднай палітыкі ці зменамі ў міжнародных ланцужках паставак. Краіна таксама разглядае сваю абаронную прамысловасць як пасляваенны артыкул прыбыткаў для сваёй пацярпелай эканомікі і спосаб далейшай інтэграцыі ў Захад, стаўшы адным з яго пастаўшчыкоў».

Прэзідэнт Украіны Уладзімір Зяленскі раней заяўляў, што больш за 40% зброі, якая выкарыстоўваецца на лініі фронту з Расеяй, цяпер вырабляецца ва Украіне. А ў стаўленні беспілотнікаў, беспілотных наземных сістэмаў і сродкаў РЭБ, гэты паказнік набліжаецца да 100%. Украінскія вытворцы таксама выпускаюць усё большую колькасць традыцыйнай зброі – артылерыйскіх сістэмаў, бронятэхнікі, мінаў і боепрыпасаў усіх калібраў.

«У заходніх краінах існуе вялікая канкурэнцыя за найлепшых выпускнікоў факультэтаў камп'ютарных навук ці ІТ-спецыялістаў. Ва Украіне ж большая частка найлепшых талентаў пайшла ў абаронку», – кажа Роб Лі, старэйшы навуковы супрацоўнік Інстытута даследаванняў знешняй палітыкі.

Без дапамогі хаўруснікаў не абысціся

Але нават такой актыўнай трансфармацыі айчыннага арсеналу будзе недастаткова для таго, каб Украіна змагла ў адзіночку супрацьстаяць Расеі, адзначае WSJ:

«Украіне патрэбныя ЗША і іншыя заходнія хаўруснікі, каб супрацьстаяць расейскай вайсковай машыне. Яна не можа вырабіць дастатковай колькасці боепрыпасаў, каб падтрымліваць агонь сваіх гарматаў, або перахопнікаў СПА, неабходных для абароны ад расейскіх ракетаў».

І хоць вытворчасць зброі квітнее, аднак бюджэт Украіны знаходзіцца на мяжы. Як заявіў дарадца Зяленскага і былы міністр стратэгічных галінаў Аляксандр Камышын, сёлета ўрад зможа набыць толькі менш за палову таго, што могуць зрабіць абаронцы.

«Балюча, калі ты не можаш вырабляць і табе няма чым ваяваць. Удвая больш балюча, калі ты можаш вырабляць, але не можаш фінансаваць набыткі», – сказаў ён.

Каб задзейнічаць свабодныя магутнасці, урады некаторых заходніх краінаў фінансуюць набыццё зброі ва ўкраінскіх абаронных кампаній паводле так званай дацкай мадэлі, калі замест таго, каб пастаўляць Кіеву заходнюю зброю, яны вылучаюць сродкі на набыццё узбраенняў ва ўкраінскіх абаронных вытворцаў. Пры гэтым вайна ва Украіне стала выпрабавальным палігонам для цэлага шэрагу ўзбраенняў і дала краінам NATO каштоўныя ўрокі таго, як яны праяўляюць сябе ў баі, адзначае WSJ.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com