The Guardian: Слабая эканоміка – уразлівае месца Пуціна

Ёсць шанец узмацніць санкцыйны ціск да краю.

Хаўруснікам Украіны неабходна ўзмацніць санкцыі, каб раскрыць уразлівасць стратэгіі Крамля па вядзенні бясконцай вайны, піша The Guardian (пераклад - сайт Charter97.org).

Заява прэзідэнта ЗША Дональда Трампа аб намеры скончыць вайну ва Украіне ў першы ж дзень яго другога прэзідэнцкага тэрміна стала яшчэ адным довадам яго няздатнасці выступаць у ролі міратворца.

Яшчэ больш трывожным сігналам з’яўляецца яго відавочная сімпатыя да Пуціна. Нягледзячы на тое, што рыторыка Трампа ў дачыненні да Пуціна злёгку астудзілася пасля ўсведамлення немагчымасці «замарозіць» канфлікт пастановай з Белага дома, прыкмет рэальнага абурэння злачыннай агрэсіяй, якая развязала гэтую вайну, па-ранейшаму няма.

Паведамленні аб нядаўняй тэлефоннай размове Трампа і Пуціна сведчаць аб адсутнасці якога-небудзь узмацнення ціску ЗША на Расею. Наадварот, ствараецца ўражанне, што Трамп губляе цікавасць да пытання і гатовы дыстанцыявацца ад украінскай тэматыкі - чым Пуцін, безумоўна, скарыстаецца.

Еўрапейскія хаўруснікі Украіны спрабуюць пераканаць Трампа заняць больш праўкраінскую пазіцыю, паралельна распрацоўваючы планы на выпадак паслаблення амерыканскай падтрымкі.

Украінскае войска ўжо не раз дэманстравала здольнасць да супраціву, стрымліваючы расейскі наступ і наносячы паразы агрэсару. Аднак, колькасная перавага застаецца на баку Пуціна. Ён спадзяецца, што можа бясконца кідаць у «мясарубку» новых прызыўнікоў і такім чынам, шляхам крывавага вымотвання, прымусіць прэзідэнта Украіны Уладзіміра Зяленскага пайсці на саступкі.

Аднак рэсурсы Расеі абмежаваныя. Нягледзячы на жорсткае прыгнечанне іншадумства, Крэмль не зможа вечна ігнараваць гібель дзясяткаў тысяч маладых расейцаў. Прапагандысцкая рыторыка пра «перамогі» ўсё менш пераконвае грамадства на фоне рэальнасці.

Слабое звяно пуцінскай стратэгіі - эканоміка, заменчаная пад вечную вайну, але не здольная задавальняць запатрабаванні грамадзян. Рост коштаў, падзенне ўзроўню жыцця і залежнасць бюджэту ад нафтавых даходаў - усё гэта робіць рэжым уразлівым. Кошт нафты падае, збольшага праз гандлёвыя абмежаванні, ініцыяваныя Трампам. Захад ужо абмежаваў кошты расейскай нафты, і ЕЗ прапануе іх знізіць яшчэ больш.

На гэтым тыдні Брусэль і Лондан скаардынавалі новы пакет санкцый, у тым ліку нацэлены на ліквідацыю «ценявога флоту», які дазваляе Расеі абыходзіць санкцыі. Кіеў заклікае да яшчэ больш жорсткіх захадаў - да другасных санкцый супраць краін, якія набываюць расейскія тавары або надаюць тэхналагічную падтрымку.

У ЗША большасць сенатараў выступаюць за ўзмацненне эканамічнага ціску на Маскву, аднак Трамп працягвае дэманстраваць схільнасць да змякчэння і нармалізацыі стасункаў з Крамлём. Ягоная прарасейская пазіцыя застаецца сур'ёзнай перашкодай на шляху падтрымкі Украіны, але яна не з'яўляецца непераадольнай. Боязь выглядаць слабым можа прымусіць Трампа адмовіцца ад поўнай капітуляцыі перад Пуціным.

Пуцін не такі непераможны, як хоча здавацца. Вобраз Пуціна як геніяльнага стратэга разбураецца на фоне дрэнна спланаванай і правальнай вайны.

Падманлівы дабрабыт расейскай эканомікі можна выкрыць - і хаўруснікам Украіны варта выкарыстаць гэты шанец, узмацніўшы санкцыйны ціск да немагчымага.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com