«У ЕЗ перастануць працаваць карткі ўсіх беларускіх банкаў»

Перавод грошай праз сістэмы, падобныя Paysend, будзе немагчымы.

Еўрапейская камісія падрыхтавала новы 18-ы пакет санкцый у дачыненні да Расеі і Беларусі ў сувязі з агрэсіяй супраць Украіны. Сярод санкцыйных прапаноў ёсць і поўная забарона на аперацыі з беларускімі банкаўскімі структурамі.

18-ы пакет санкцый павінны ўзгадніць усе чальцы Еўразвязу, яго прыняцце чакаецца цягам чэрвеня.

«Філін» даведаўся ў эканаміста Дзмітрыя Крука аб наступствах магчымай пастановы.

- Цяпер чатыры беларускія банкі адключаныя ад SWIFT. Цяпер прапануюць увесці поўную забарону на аперацыі з беларускімі банкаўскімі структурамі. Што гэта азначае?

- Адразу абмовімся, што дакумент яшчэ не прыняты. Калі яго прымуць у такім выглядзе, гэта будзе азначаць поўнае адлучэнне беларускіх банкаў ад еўрапейскай, нават хутчэй ад глабальнай банкаўскай сістэмы.

І тыя вокны ў сістэме разлікаў, у руху грошай, якія цяпер яшчэ захоўваюцца, будуць закрытыя.

- А хіба пераход беларускіх банкаў на «расейскі заменнік SWIFT» — сістэму СПФС — не дапаможа ў гэтым выпадку?

- Дагэтуль у беларускіх банкаў у вельмі ўсечаным маштабе, але застаюцца транзакцыі з еўрапейскімі контрагентамі. Праз некалькі банкаў па-ранейшаму можна перавесці грошы на рахункі ў еўрапейскія банкі і прыватным, і юрыдычным асобам.

Гэта дазваляе абслугоўваць гандлёвыя плыні, якія ўсё яшчэ легальна праходзяць паміж Беларуссю і ЕЗ. Такая магчымасць знікне.

Тое, што беларускія банкі перайшлі на СПФС, ніяк не дае ім магчымасць праводзіць транзакцыі з заходнімі краінамі. З імі ўсё адно фінансавае абслугоўванне, дзе гэта да гэтага часу магчыма, ідзе праз SWIFT.

І банкі, якія маюць доступ да SWIFT, да карэспандэнцкіх рахункаў з еўрапейскімі банкамі, вельмі важныя і каштоўныя для беларускага бізнэсу.

Хоць, калі патэнцыйна такая магчымасць знікне, гэта, вядома, будзе непрыемна, але, я б не сказаў, што трагічна. Таму што пры дапамозе розных абыходных пасрэдніцкіх ланцужкоў, праз Расею, Казахстан, Узбекістан, Кыргызстан, Грузію, Турцыю і іншыя краіны, з дапамогай той жа СПФС можна даводзіць грошы да канчатковага бенефіцыяру.

Гэта значыць спачатку грошы адправяць у адну з названых краін, і ўжо адтуль яны працягнуць рух ад імя іншай фірмы ў кірунку канчатковага бенефіцыяра.

У 2020 ці 2022 годзе адключэнне SWIFT сапраўды магло на нейкі перыяд спаралізаваць фінансавую сістэму з пункту гледжання абслугоўвання замежных аплат.

Але цяпер да гэтага шоку прэвентыўна ўсе гатовыя. Думаю, што ўсе банкі дапускаюць такую імавернасць, таму поўная забарона на транзакцыі наўрад ці выкліча калапс.

- А на звычайных грамадзянах гэтая магчымая забарона неяк адаб'ецца?

- Я ўжо адзначыў, што сёння яшчэ ёсць магчымасць, хай і невялікая, пераводзіць грошы ў заходнія краіны на банкаўскія рахункі. Напрыклад, вы хочаце адправіць грошы на свой рахунак альбо рахунак свайго сваяка, альбо атрымаць грошы.

Адправіць SWIFT-перавод, скажам, за набыццё аўтамабіля замежнай фірме і г.д. вось такія пераводы закрыюць наогул. Людзям даядзецца шукаць абыходныя шляхі.

З карткавымі сістэмамі сітуацыя крыху больш складаная.

Але калі адбудзецца поўнае спыненне ўсіх карэспандэнцкіх дачыненняў з заходнімі банкамі і адлучэнне ад SWIFT, з вельмі вялікай імавернасцю, гэта адаб'ецца і на карткавых магчымасцях.

Найбольш імаверна, што перавод грошай праз сістэмы, падобныя Paysend, будзе немагчымы. Акрамя таго, у заходніх краінах, у ЕЗ перастануць працаваць карткі не асобных беларускіх банкаў, а ўсіх.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com