NYT: Украіна і Ізраіль паказалі, што ў сучаснай вайне з'явілася новая магутная зброя

Яна можа стаць асабліва прывабнай у сакрэтных аперацыях.

Ударныя дроны – невялікія, цяжка выяўляюцца і здольныя наносіць магутныя ўдары. Яны сталі грознай зброяй у сучаснай вайне. Аднак апошнія аперацыі Украіны і Ізраіля, падчас якіх дроны запускаліся з глыбіні варожай тэрыторыі – прадэманстравалі новы ўзровень іх разбуральнай моцы.

Як піша The New York Times, эфект нечаканасці, звязаны з неабходнасцю адбіваць напады дронаў знутры, спалучае ў сабе класічную ваенную стратэгію і сучасныя тэхналогіі.

«Шпіёнскія апараты і сакрэтныя аперацыі даўно сталі часткай баявых дзеянняў, але, як адзначаюць эксперты, іх выкарыстанне для разгортвання дронаў за лініяй фронту – гэта новая тактыка ў мастацтве вайны, які ўвесь час развіваецца», – піша выданне.

Так, у ходзе ўкраінскай аперацыі «Павуціна» больш за 40 расейскіх ваенных самалётаў былі падбіты роем дронаў, якія Украіна таемна размясціла паблізу ваенных базаў у Расеі. А ўсяго праз два тыдні Ізраіль падчас сваёй аперацыі знішчыў ракеты, перахопнікі і сістэмы супрацьпаветранай абароны Ірана дронамі, якія раней кантрабандай увезлі ізраільскія выведнікі.

Як адзначыў Асаф Арыён, адстаўны ізраільскі брыгадны генерал і стратэг у пытаннях абароны ў Вашынгтонскім інстытуце блізкаўсходняй палітыкі, падыход Ізраіля даў яму перавагу ў шырокамаштабным нападзе на Іран.

«Іран павінен не толькі глядзець на захад, каб убачыць, што адбываецца, але і глядзець унутр», – сказаў Арыён.

Прэм'ер Ізраіля Біньямін Нетаньяху параўнаў гэтую атаку з іншай аперацыяй Ізраіля, праведзенай у верасні летась у Ліване, дзе пэйджары і рацыі, начыненыя выбухоўкай, былі накіраваныя супраць Хезбалы. Гэтую аперацыю таксама згадвалі эксперты выведкі пасля нечаканага ўдару Украіны па Расеі, як прыклад таго, як тэхналогіі хутка мяняюць спосабы вядзення вайны.

Аднак у аснове ўсіх трох ваенных місій – у Ліване, Расеі і цяпер у Іране – ляжаць карпатлівыя намаганні ў зборы выведных звестак. Такія аперацыі могуць доўжыцца гадамі і спалучаныя з вялікай рызыкай, адзначае NYT.

«Урэшце дроны – гэта ўсяго толькі інструменты, і тое, як іх можна выкарыстоўваць, залежыць ад вашай крэатыўнасці. Так што гэтая натуральная эвалюцыя – толькі прадчуванне таго, што нас чакае ў будучыні», – сказаў Фарзан Сабет, аналітык Ірана і сістэмаў узбраенняў у Жэнеўскім інстытуце.

Паводле словаў Сабета, дроны могуць стаць асабліва прывабнай зброяй у сакрэтных аперацыях, калі іх можна будзе часткамі і паступова вазіць на тэрыторыю ворага, што зробіць іх яшчэ больш цяжкавыяўнымі.

«Падобнасць паміж аперацыямі ў кантрабандзе дронаў, якія праводзяцца Ізраілем і Украінай, дазваляе выказаць здагадку, што такая тактыка будзе капіявацца ў іншых канфліктах – прынамсі датуль, пакуль не будуць распрацаваныя яшчэ навейшыя, утоеныя або магутныя стратэгіі вядзення вайны», – адзначаецца ў артыкуле.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com