NYT: Напад ЗША на Іран прадэманструе слабасць Кітая

КНР можа шмат страціць ад вайны на Блізкім Усходзе, аднак мала што можа з гэтым зрабіць.

Прэзідэнт ЗША Дональд Трамп разглядае магчымасць размяшчэння амерыканскіх войск для падтрымкі Ізраілю ў нападзе на Іран, пры гэтым Кітай мала што можа з гэтым зрабіць, бо яго ўплыў у рэгіёне відавочна абмежаваны, піша The New York Times .

Кітаю ёсць што губляць праз некантраляваны канфлікт. Ён набывае практычна ўсю экспартаваную Іранам нафту са зніжкай, выкарыстоўваючы таемны танкерны флот, каб абысці санкцыі ЗША. І яго судны залежаць ад бяспечнага праходу праз Армузскую пратоку для транспартавання дадатковай нафты з краін Персідскай затокі.

Больш высокія кошты энэрганосьбітаў стануць яшчэ адным сур'ёзным галаўным болем для Пекіна, які спрабуе страпянуць сваю млявую эканоміку. Апроч энэрганосьбітаў, Іран дае Кітаю важны плацдарм на Блізкім Усходзе для прасоўвання сваіх інтарэсаў і супрацьдзеяння Злучаным Штатам.

«Але, нягледзячы на гэтыя стратэгічныя інтарэсы, Кітай, які не мае вялікага ўплыву на адміністрацыю Трампа, наўрад ці ўстане на ваенную абарону Ірана, асабліва калі ў вайну ўмяшаюцца Злучаныя Штаты», - адзначаецца ў артыкуле.

«Рэальнасць такая, што ў іх фактычна няма магчымасці ўвесці кітайскія войскі для абароны іранскіх аб'ектаў», – сказаў Зак Купер, старэйшы навуковы супрацоўнік Амерыканскага інстытута прадпрымальніцтва ў Вашынгтоне.

«Яны аддалі б перавагу вельмі ціха надаць некаторую матэрыяльную падтрымку, некаторую рытарычную падтрымку і, магчыма, некаторую гуманітарную дапамогу».

У той жа час, падкрэсліваецца ў артыкуле, Кітай таксама можа мець дывідэнды, калі Злучаныя Штаты будуць уцягнутыя ў зацяжную вайну на Блізкім Усходзе, што можа адцягнуць амерыканскія войскі, караблі і іншыя вайсковыя рэсурсы ад Азіі.

«Пастанова Трампа нанесці ўдар па Іране стане ўрокам для Пекіна, які можа сфармаваць яго ўласную геапалітычную стратэгію. Кітай паспрабуе зразумець падыход Трампа да замежнай палітыкі і яго гатоўнасць ужываць сілу. Вынік можа паўплываць на ацэнку Пекінам таго, ці прыйдуць ЗША на абарону Тайваня, калі Кітай наважыцца ўварвацца ў яго».

Як піша NYT, стрыманая рэакцыя Кітая нагадвае рэакцыю Расеі, якая таксама ўсяго толькі выступіла з заявамі аб падтрымцы Ірана, нягледзячы на тое, што атрымала вельмі неабходную вайсковую дапамогу ад Тэгерана для сваёй вайны ва Украіне.

Такая рэакцыя ўзнімае пытанні аб згуртаванасці квартэта Кітая, Расеі, Ірана і Паўночнай Карэі, якія зблізіліся дыпламатычна і ў вайсковым плане вакол агульнай апазіцыі сусветнаму парадку, у якім дамінуюць ЗША.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com