19 лiпеня 2025, Субота, 19:28
Падтрымайце
сайт
Сім сім,
Хартыя 97!
Рубрыкі

Іран тэстуе ўласны «Арэшнік на мінімалках»

Іран тэстуе ўласны «Арэшнік на мінімалках»
ілюстрацыйнае фота

Што вядома аб балістычнай ракеце, якая ўдарыла па Ізраілі.

19 чэрвеня Іран упершыню ўжыў па Ізраілю новую балістычную ракету сярэдняй далёкасці. Яна вельмі нагадвае расейскую ракету «Арэшнік», хоць і менш магутная і створаная паводле больш простых тэхналогій.

Пра гэта паведамляе Defence Exspress.

Падчас ранішняга ўдару 19 чэрвеня Іран ужыў новы тып ракет сярэдняй далёкасці. Іх асаблівасць у наяўнасці незвычайнай баявой часткі - замест манаблока ў іх змяшчаецца амаль 20 суббоепрыпасаў.

Гэтая ракета патрапіла па горадзе Азоры паблізу Тэль-Авіва, і гэта стала першым выпадкам выкарыстання такога тыпу ўзбраення Іранам.

Новы тып - новая пагроза для мірнага насельніцтва

Паводле інфармацыі камандавання войска Ізраілю, кожны з суббоепрыпасаў змяшчае прыблізна 2,5 кг выбухоўкі. Раскрыццё баявой часткі адбываецца на вышыні блізу 7 км, пасля чаго набоі рассейваюцца ў радыусе да 8 км.

Пакуль сапраўды не ўстаноўлены тып гэтай ракеты, але сярод магчымых варыянтаў называюць Khorramshahr-4 Kheibar.

Ізраіль назваў новую баявую частку касетнай. Аднак улічваючы яе канструкцыю, больш падыходзіць параўнанне з паасобнай галаўной часткай, якую выкарыстоўваюць у балістычных ракетах для ўскладнення перахопу і нанясення ўдараў па некалькіх цэлях адначасова.

Аналаг расейскага «Арэшніка», але на мінімалках

Паводле аналагічнай схемы працуе расейская ракета сярэдняй далёкасці «Арэшнік», а таксама міжкантынентальныя ракеты з MIRV (Multiple Independently Tarjetable Reentry Vehicle).

Разам з тым, іранская ракета, магчыма, выкарыстоўвае прасцейшую сістэму MRV - рассейванне блокаў без індывідуальнага навядзення.

Тэхнічнае параўнанне з МБР ЗША і СССР

Упершыню сістэма MRV была ўжытая на амерыканскай Polaris A-3 у 1964 годзе. СССР адказаў шахтавай Р-36П (1970) і падводнай Р-27У (1974), кожная з якіх несла па тры ядзерныя баявыя часткі.

Аднак у адрозненне ад гэтых узораў, іранская ракета рассейвае суббоепрыпасы на значна ніжэйшай вышыні - усяго 7-8 км.

Новы выклік для ізраільскай сістэмы супрацьракетнай абароны

Каб эфектыўна нейтралізаваць пагрозу, яе трэба збіваць яшчэ да падзелу баявых элементаў - на вялікай адлегласці, з дапамогай сістэм Arrow-3 ці THAAD. Калі ж падрыў адбудзецца над горадам, суббоепрыпасы ўсё адно ўпадуць у межах агламерацыі.

Такім чынам, адзінай надзеяй для перахопу на найбліжэйшай адлегласці застаецца сістэма Iron Dome. Але вялікая колькасць суббоепрыпасаў можа яе перагрузіць. Хутчэй за ўсё, менавіта гэта і адбылося падчас удару 19 чэрвеня, бо ізраільская СПА не гарантуе абарону ад маштабных нападаў, нават нягледзячы на актыўныя ўдары ЦАХАЛу па іранскіх пускавых устаноўках і заводах.

Таксама сачыце за акаўнтамі Charter97.org у сацыяльных сетках