Зяленскі сустрэўся з Трампам на палях саміту NATO

Сустрэча працягнулася больш за 40 хвілін.

Прэзідэнты Украіны і ЗША Уладзімір Зяленскі і Дональд Трамп сустрэліся на палях саміту NATO, які праходзіць сёння ў Нідэрландах. Аб гэтым паведамляе ўласны карэспандэнт unian.net у Гаазе. Гэтую інфармацыю журналістам пацвердзіў прэс-сакратар прэзідэнта Сяргей Нікіфараў.

Гэта першыя перамовы лідараў за апошнія 2 месяцы. Мінулы раз Зяленскі бачыўся з Трампам у Ватыкане, у красавіку гэтага года. Абодва ездзілі туды на пахаванне Папы Рымскага Францішка.

Іх сустрэча на саміце G7 у Канадзе раней у чэрвені так і не адбылася праз датэрміновы ад'езд Трампа на фоне абвастрэння на Блізкім Усходзе.

Паводле інфармацыі карэспандэнта ўкраінскага выдання, сустрэча Зяленскага і Трампа працягнулася больш за 40 хвілін. Пасля яе прэсу не дапусцілі да лідараў і ніякіх заяў зроблена не было.

Трамп пракаментаваў сустрэчу з прэзідэнтам Украіны падчас сваёй прамовы на саміце Альянсу ў Гаазе.

«Я проста хацеў даведацца, як у яго справы. Насамрэч гэта было вельмі прыемна. Ведаеце, у нас былі невялікія цяжкасці, але часам ён быў вельмі мілы. Думаю, ён хацеў бы, каб усё гэта скончылася. Я так думаю», – сказаў Трамп.

Паводле ягоных словаў, падчас сустрэчы з Зяленскім ён зразумеў, што той «хацеў бы, каб усё гэта скончылася». Трамп мяркуе, што цяпер «самы прыдатны час, каб пакласці гэтаму канец».

«Я думаю, гэта вельмі добры час, каб спыніць вайну. І калі я змагу, я пагавару з Пуціным, ці можам мы спыніць вайну. Яны (украінцы, – рэд.) смелыя людзі, Зяленскі адваёўвае сваю дзяржаву. Гэта вельмі складаная бітва, якую ён вядзе, але ён вельмі паспяховы ў ёй», – сказаў Трамп.

Зяленскі, у сваю чаргу, пракаментаваў сустрэчу з прэзідэнтам ЗША ў Telegram.

Паводле ягоных словаў, падчас размовы яны «ахапілі ўсе сапраўды значныя пытанні».

«Я дзякую спадару прэзідэнту, дзякую Злучаным Штатам. Гаварылі, як дасягнуць спынення агню і сапраўднага міру. Гаварылі, як абараніць нашых людзей.

Шануем увагу і гатоўнасць дапамагаць набліжэнню міру. Дэталі – пазней», – напісаў Зяленскі.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com