У Беларусі адкрываецца паляванне на мядзведзя

Каля ста гадоў у краіне нельга было чапаць гэтага чырванакніжнага звера.

З 1 ліпеня ў Беларусі можна будзе падстрэліць мядзведзя. Раней паляванне на гэтую жывёлу было забароненае.

«Адкрыццё палявання на мядзведзя звязанае з рэзкім ростам яго колькасці і з мэтай выключэння канфліктных сітуацый паміж зверам і насельніцтвам», – паведамілі ў Мінлясгасе.

Пад прыцэл могуць патрапіць жывёлы любога полу і ўзросту.

Паляваць можна цягам дня з засады, з падыходу ў прысутнасці кіраўніка палявання. Пры гэтым можна выкарыстоўваць:

наразную паляўнічую зброю

гладкаствольную паляўнічую зброю не менш за 16 калібр з выкарыстаннем патронаў, забяспечаных куляй

паляўнічых сабак: пароды на пастанову карыстальніка паляўнічых угоддзяў.

Яшчэ адзін нюанс: стаж у паляўнічага павінен быць не меншы за тры гады.

Здабыча мядзведзя прадоўжыцца да 31 снежня.

Колькі каштуе такое задавальненне

Вызначаны наступны мінімальны лімітавы кошт дазволу на здабычу мядзведзя:

для грамадзянаў Беларусі і краінаў Еўразійскага эканамічнага звязу (ЕАЭС) – Br500

для грамадзянаў іншых замежных дзяржаваў – Br1000.

Дадаткова кожнаму паляўнічаму трэба будзе заплаціць за пуцёўку не менш як Br5.

Раней кіраўнік аддзела паляўнічай гаспадаркі Мінлясгаса Аляксандр Казарэз паведаміў, што ў Беларусі значна вырасла колькасць мядзведзяў.

Паводле звестак на 2023 год, па ўсёй краіне зарэгістравана 700 асобінаў. Для параўнання, у 2003 годзе іх было толькі 150.

Прадстаўнік міністэрства ўказаў, што рост колькасці драпежнага звера звязаны з дзейнасцю паляўнічых гаспадарак, а таксама з аховай угоддзяў і паляпшэннем кармавых умоваў.

Нагадаем, што мядзведзь унесены ў Чырвоную кнігу. Паляванне на яго ў Беларусі было забароненае амаль цэлае стагоддзе.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com