Літва збіла дрон, які заляцеў з Беларусі
2- 16.07.2025, 17:11
- 4,602

Патрульныя выкарысталі сродак перахопу БПЛА.
Літоўскія памежнікі збілі невялікі беспілотны апарат, які заляцеў на тэрыторыю краіны з Беларусі.
Пра гэта паведаміла Дзяржаўная памежная служба краіны (VSAT), перадае LRT.
З дапамогай антыдронавага абсталявання памежнікі ў Салечніцкім раёне Літвы збілі невялікі беспілотны апарат, які ўляцеў з Беларусі. Са звестак VSAT, такія беспілотнікі выкарыстоўваюцца кантрабандыстамі.
Уночы ў сераду, 16 ліпеня, супрацоўнікі памежнага паста Трыбоніс пачулі гук, характэрны для лятальнага апарата, паблізу мяжы з Беларуссю ў Салечніцкім раёне. Адначасова яны заўважылі невялікі беспілотны апарат, які ляцеў ад мяжы з Беларуссю ў бок тэрыторыі Літвы.
Патрульныя VSAT выкарысталі сродак перахопу беспілотных лятальных апаратаў. Аб'ект, на які быў ужыты сродак, пачаў круціцца на значнай вышыні, затым перакуліўся ў паветры і ўпаў.
Памежнікі знайшлі разбіты БПЛА, абсталяваны GPS-прыладай, прыкладна за 4 км ад мяжы.

