Яшчэ адная анекдатычная пастанова Лукашэнкі

Неўзабаве беларускіх дыпламатаў будуць адпраўляць на адпрацоўку ў родны раён.

"Поспехі" беларускай дыпламатыі дасягнулі такіх вышынь, што дыпламатаў ужо стала няма куды падзець. На сустрэчы з губернатарам Самарскай вобласці Лукашэнка паабяцаў перанакіраваць дыпламатычны рэзерв з захаду на ўсход. Праўда, на Усходзе выбар кірункаў пераразмеркавання дыпламатычных рэсурсаў таксама не адрозніваецца вялікай разнастайнасцю, піша planmedia.io.

«Той рэзерв дыпламатаў, які ў нас сёння створаны, мы гатовыя перанакіраваць з захаду на ўсход. Не хочуць працаваць з Беларуссю — сёння ў свеце дастаткова дзяржаў, якія з задавальненнем з намі супрацоўнічаюць», — сказаў Лукашэнка.

Пакараць Еўропу адкліканнем беларускіх дыпламатаў беларускія ўлады пагражаюць яшчэ з канца 2020 года. На патрабаванні беларускага МЗС штат амбасад ЗША і 9 краін Еўразвязу ў Менску быў скарочаны ў некалькі разоў.

ЕЗ і ЗША адказалі поўнай узаемнасцю. Беларускія дыпламаты з гэтых краін пацягнуліся на радзіму. Нябожчык міністр замежных спраў Уладзімір Макей прыстрашыў Еўропу шматвектарнасцю і паабяцаў, што на беларускіх дыпламатаў будзе шырокі попыт.

«Мы значна скарачаем дыпламатычную прысутнасць у еўрапейскіх краінах. Мы скарачаем колькасць дыпламатычнага персаналу. Але яго мы ў значнай меры перакідваем на іншыя абсягі працы, на іншыя кірункі, дзе яны будуць запатрабаваныя», — сказаў тады Макей.

Прайшло чатыры гады, а дыпламатычныя рэзервы так і засталіся незапатрабаванымі. Мабыць, у Кітаі і так занадта шмат людзей, а краіны далёкай дугі занадта далёка. Так што з усіх шматлікіх вектараў у беларускіх дыпламатаў застаўся адзін.

«З Захаду мы практычна забралі свае дыпламатычныя прадстаўніцтвы. Калі яны не хочуць з намі супрацоўнічаць, чаго нам біцца ў замкнутыя дзверы. Мы пашыраем сваю прысутнасць там, дзе нас хочуць бачыць. І перш за ўсё ў нашай Расейскай Федэрацыі», — сказаў Лукашэнка.

Нельга сказаць, што раней прадстаўніцтва Беларусі ў Расеі было недастаткова шырокім. На 2020 год у Расеі дзейнічала беларускае пасольства і яшчэ 12 яго прадстаўніцтваў. Але дыпламатамі беларуская зямля цяпер багатая, а падзець іх няма куды. Таму статус большасці аддзяленняў пасольства падвысілі да ўзроўню Генеральнага консульства. З адпаведным пашырэннем штату. Але на ўсіх рэзервовых дыпламатаў нават пашыранага штату не стае.

«Таму МЗС пастаўленая задача, каб мы ўздымалі ўзровень нашага супрацоўніцтва», — сказаў Лукашэнка.

У Расеі - 89 суб'ектаў Федэрацыі. Уключаючы 24 рэспублікі, 9 краёў і адну аўтаномную вобласць. Таму беларускай шматвектарнасці ёсць яшчэ дзе разгарнуцца. А калі свабодныя суб'екты Федэрацыі ў Расеі скончацца, можна пайсці яшчэ далей.

Увесці для выпускнікоў МА мэтавае размеркаванне. Каб не гойсалі па замежжы, а пасля заканчэння вучобы адразу ехалі адпрацоўваць у родны раён. Тады і праблем з працаўладкаваннем не будзе. Калі для лекараў дзейнічае прынцып: дзе нарадзіўся, там і прыгадзіўся, то чым дыпламаты горш?

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com