Свабоду палітвязням!

Нядзелю 19 снежня 2010 года ў Беларусі назвалі «крывавай». У дзень прэзідэнцкіх выбараў у краіне была жорстка разагнаная мірная акцыя пратэсту супраць фальсіфікацый вынікаў галасавання, арыштавана больш за 1000 чалавек, у тым ліку практычна ўсе кандыдаты ў прэзідэнты, сябры іх каманд, журналісты, праваабаронцы. Больш за 40 чалавек былі прысуджаныя да абмежавання ці пазбаўлення волі, беспрэцэдэнтна вялікія турэмныя тэрміны атрымалі кандыдаты ў прэзідэнты і актывісты іх каманд - ад 2 да 6 гадоў.

Амаль год ні ў чым не вінаватыя людзі знаходзіліся за кратамі, падвяргаліся катаванням і бесчалавечнаму абыходжанню. Пад уплывам санкцый з боку Захаду і ў сувязі з катастрафічным становішчам беларускай эканомікі дыктатар Лукашэнка быў вымушаны вызваліць некаторых палітвязняў.

У турмах працягваюць заставацца кандыдат у прэзідэнты Мікалай Статкевіч і яшчэ 5 актывістаў апазіцыі.

Міжнародная супольнасць і праваабарончыя арганізацыі патрабуюць вызвалення беларускіх вязняў сумлення. Еўрапейскі Звяз і ЗША ўвялі візавыя і эканамічныя санкцыі супраць памагатых дыктатара - чыноўнікаў і бізнесменаў, замяшаных у правядзенні рэпрэсій і фінансавай падтрымцы рэжыму, для таго, каб дамагчыся выхаду на волю астатніх 6 палітвязняў.

Юрый Рубцоў: 225140, Брэсцкая вобл, Пружанскі раён, в. Куплін, папраўчая ўстанова адкрытага тыпу №7.

Яўген Васьковіч: 212011, Магілёў, вуліца Крупскай 99а, турма №4

Мікалай Дзядок: 212011, Магілёў, вуліца Крупскай 99а, турма №4

Ігар Аліневіч: 211300, Віцебская вобл., Віцебскі р-н, п. Віцьба. ПК № 3

Арцём Пракапенка: 212013, Магілёў, Слаўгарадская шаша 183, калонія №15

Мікалай Статкевіч: 213004, Шклоў, вул. 1-я Заводская, 8, ПК-17